بعد الإخبار ضد رياض سلامة.. معن الإسعد: اذا راح القضاء بيضل القدر

2020 -

كانون الثاني -

بتاريخ 28 - 10 - 2019 تقدَّم المحامي معن الأسعد بإخبارٍ بوجه حاكم مصرف لبنان رياض سلامة، وكل من يُظهرهُ التحقيق متدخلًا، فاعلًا، شريكًا، محرضًا بجرائم إختلاس ونهب وهدر المال العام والخاص، والإثراء غير المشروع والرشوة وصرف النفوذ والغش والإخلال بالإنتظام العام.

وبحسب إفادة صادرة عن النيابة العامة التمييزية، فقد تبيّن أنه بنتيجة التحقيقات التي أجريت، صدر بتاريخ 5 - 12 - 2019 قرارًا قضى بحفظ الأوراق لعدم ثبوت الجرائم الجزائية ولكون مخالفة المادة 20 من قانون النقد والتسليف ترتب تدابير مسلكية وليس جزائية.

ونشر الأسعد عبر حسابه على مواقع التواصل الإجتماعي الرسالة التالية:

"اذا راح القضاء بيضل القدر ........
بتاريخ 28/10/2019 تقدمت بإخبار بوجه حاكم مصرف لبنان الموظف العام رياض سلامة بجرائم إختلاس و نهب و هدر المال العام و الخاص و الاثراء الغير المشروع و الرشوة و صرف النفوذ و الاخلال بالانتظام العام كما طلبت ابلاغ مجلس الوزراء بنتائج التحقيقات للأنغقاد فورا" و عزل رياض سلامة من موقعه سندا" لنص المادتين 19 و 20 من قانون النقد و التسليف و انشاء مصرف لبنان.
الاخبار استند الى تقربر اعده الاعلامي في تلفزيون الجديد رياض قبيسي ابرز فيه مستندات خطرة جدا" و كشف حسابات مصرفية بإسم رياض سلامة و الكثير من الجرائم الاخرى ,
و طلبت اعتماد الكتاب الذي ارسله نادي القضاة الى الهيئة المصرفية الخاصة في مصرف لبنان كخارطة طريق للمباشرة بكشف و محاسبة الفاسدين و المفسدين.
قامت الدنيا عليي و ما قعدت ،
هيدي يقلي يا مجنون شو قصتك !!!!!
و هيدا يقلي راحت عليك انت ما بتعرف هيدا مين ؟؟؟؟
بصراحة ،
قلت لحالي هيدا رياض سلامة احلى هدف للمحاسبة لأنو هوي مدير عمليات عصابة اللصوص الوقحة التي تحكم وطننا و لأنو طايفتو مش رح تحميه ،
اذا بدك تتشكى على زعيم سني فاسد مثلا" بدك تجيب معو واحد شيعي و درزي و علوي و ماروني و ارثوذوكسي و كاثوليكي و سرياني و ارمني و اشوري و كلداني و سنسكريتي و اعذروني اذا نسيت حدا من الشباب الطيبة،
لأنو اذا ما عملت هيك بصير انا زلمي طائغي و مذهبي و بيصير الفاسد الحرامي خط احمر يمثل كرامة و وجود الطائفة بإمها و ابوها الله وكيلكون .
المهم ،
تحول الاخبار الى المحامي العام التمييزي و حددتلي جلسة للإدلاء بإفادتي و سألتني " واذا كان معو رياض سلامة مصاري ؟ شو ممنوع ؟"
قلتلها لأ مش ممنوع شرط ما يكون من مال الدولة و من جيبتي و جيبتك .
و ختمت إفادتي بالحرف : اذا سمحتي استدعي معد التقرير الاعلامي رياض قبيسي و استلمي منو المستندات يلي برزها بالتحقيق بيطلع معك يا اما رياض سلامة فاسد يجب حبسو و الحجز على اموالو و عزلو من منصبو او رياض قبيسي زور المستندات و فبرك خبرية طويلة عريضة و فيكي تاخدي بحقو الاجراءات اللازمة.
منيح هيك؟؟؟؟
و من وقتها و انا براجع بالاخبار و شو صار فيه :
بعتو ورا رياض سلامة و عطا افادتو او بعد ؟
طيب بعتو عل قليلي ورا رياض قبيسي او بعد ؟
و فجأة خبروني انو حضرة المحام العام التمييزي قررت لا تبعت ورا رياض الاول و لا رياض الثاني .
قال " حفظت الاوراق لعدم ثبوت الجرائم الجزائية و لكون مخالفةالمادة 20 من قانون النقد و التسليف ترتب تدابير مسلكية و ليس جزائية "!!!!!!!
يا عالم
يا هوه
اذا واحد بيدعو عليه انو سرق الشمس مش بيبعتو وراه على المخفر و بيعطي افادة بيقول فيها انا بريء و ما خصني ؟؟؟؟
طيب اذا كتاب معلومات او وثيقة اتصال مش بتخرب الدنيا و القوى الامنية ليجيبو يلي جايي اسمو بالكتاب؟؟؟؟؟
هيدا اذا مواطن عادي ،
بس رياض سلامة طائغتو مش مسلم ولا مسيحي،
هيدا طأئفتو المال ...
ماشي الحال ،
انا رجعت تقدمت بتوسع بالتحقيق و طلبت من القاضي يسألو عن مصاري الشعب اللبناني كلو في المصارف يلي خبطتون عصابة اللصوص الوقحة التي تحكم وطننا بتنفيذ من رياض سلامة،
سرقو المصاري و سموها "هندسة مصرفية " ،
معقولي مهندس يكون حرامي ؟
عيب علينا ،
استعمل مصطلحات اجنبية : capital control و hair cut.....
الزلمي عم يحكي بالانكليزي و عارف حالو شو عم يعمل و نحنا شكلنا ما عم نفهم عليه لأننا جهلة.......

خبطو جنى عمر المواطن و يلي ورثوه عن اهلهم الله وكيلكون .
بركي القاضي بيبعت وراه و بيسألو وين لائحة الاموال يلي تم تهريبها للخارج و بإسم مين ؟
بركي بيسألو ليش كان كل شوي يتنطح و يقول الليرة بألف خير؟
بركي بيسألو كيف رح يقبض هل قاضي تعويض نهاية الخدمة من البنك ؟
بركي بيسألو ليش معاشو قريبا" جدا" بيصير بيشتريلو كرتونة بيض و فروجين بلا حمص و بلا ثوم كمان !!!!!!!!!!
على كل حال انا مكفي و لاحقو لآخر نفس ،
ويلي معو الله عز و جل ما يخاف من حدا .....
واذا راح القضاء بيضل القدر.........

و الله ولي التوفيق

معن عدنان الأسعد"

تابعوا آخر أخبار "Radar Scoop" عبر Google News، اضغط هنا